2014年12月11日，早上9時。
大家可以花時間睇吓黃之鋒852郵報一分為三節的專訪。
http://www.post852.com/黃之鋒信下年再有佔領出現%E3%80%80批泛民邊說交棒邊指/


比起令我少少少少心寒同感覺怪異但我諒解既抗爭嘉年華化乜乜乜（我琴晚唔喺金鐘現場，無憑無據唔適宜俾意見），更令我擔心既係自己人打自己人，我指既係so-called 勇武激進派批評雙學同so-called 金鐘人自我安慰階段性勝利和只懂和理非非等等。其實黃之鋒反對呢種階段性勝利既講法。而我都同意佢講既香港民意未接受到暴力抗爭而好少香港人真係會走出黎同警察明槍實火打過。成日話要升級既人究竟想點升？又無人畀到個實際行動方案。

我今朝起身前夢見一班年青人戴住口罩眼罩出發去中環升級（但背景是Michigan畢業禮，時空錯亂）。可能我潛意識都希望有人「衝」。

未講完——「泛民」真係信唔過。唔想投俾建制派亦唔想投畀佢地。希望下一次議會選舉有新血參選，俾到泛民老鬼一啲壓力。

我唔知有幾多人真係平時無出過金鐘，臨到最後一晚先去影相打卡聽演唱會。我又唔係佢地心入面條蟲，又唔認得佢地個樣。但與其做鍵盤戰士鬧呢班人，不如諗下佢地喺爭取真普選既路上適合擔任咩崗位，可以貢獻乜。如果失去呢一大班人，只憑人丁單薄又未有足夠訓練既激進派，真係可以成功向政府施壓？
真心覺得兵都未當過既香港人要先練下功夫體能、接受武裝訓練先好同人講武力升級。唉，人地韓國台灣以前都打過仗，男人當過兵，打起上黎都有經驗先。